Канон о примирении Православной Церкви
Песнь 1, ирмос
Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Помилуй нас, Боже, помилуй нас.
Веры яже в Тя истинныя камень основание незыблемое Церкви Твоей положивый, Христе Царю, и еже адовыми враты не одолетися ей обещание неложное давый, от нынешних еретических бед и обстояний отступнических избави ю вскоре, со слезами молим Тя, юже честною Своею искупил еси кровию.
Помилуй нас, Боже, помилуй нас.
Разверзоша адова врата уста богохульная еже нещадно Церковь Твою поглотити, но Ты, истинный тоя, Христе Царю, Женише, Божественною Твоею силою тех загради, сердцем сокрушенным молим Тя, и вскоре от всех обстояний сию свободну покажи, юже честною Своею искупил еси кровию.
Помилуй нас, Боже, помилуй нас.
Краеуголен камень и глава сый, Христе Царю, телу Церкве Твоея, ту безбожне на уды растерзающих вскоре жезлом Креста Твоего разжени, и от них возмущенную Божественною Твоею силою умири, юже честною Своею искупил еси кровию.
Слава, и ныне:
Утроба, Бога носившая, Мати благословенная, предстательнице и покрове рода нашего, стадо Сына Твоего, от волк хищных возмущенное, покрый, и от душевреднаго их наваждения избави, молим усердно, Сын бо Твой и Бог наш честною Своею то искупил есть кровию.
Песнь 3, ирмос
Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Помилуй нас, Боже, помилуй нас.
Ты, человеколюбче Спасе, ведый озлобление Церкви Своея от противных сущее, умилосердися, призрев на моление наше, и вскоре, яко благосерд, изми ю от всех бед и скорбей, и в мире глубоце на камени истиннаго исповедания утверди, да вси в единомыслии со Отцем и Духом в едином существе славим Тя, нераздельна Бога.
Помилуй нас, Боже, помилуй нас.
Восташа волци тяжци, нещадне расхищающи и распужающе словесных Твоих овец церковное стадо, безбожне прелестию поглотити тщащеся, но Ты, Христе, Пастырю добрый, душу Свою о нас положивый, от сих свободи и скоро избави, да вси в единомыслии со Отцем и Духом в едином существе славим Тя, единаго Бога.
Помилуй нас, Боже, помилуй нас.
Единодушно согласившася на разорение Твоея Церкви, Христе, безбожнии отступницы прелестми своего суемудрия, но Ты сих советы Божественною Твоею силою, якоже древле столпотворное соединение языком, разори и размеси, со слезами молим Тя, да вси в единомыслии со Отцем и Духом в едином существе славим Тя, единаго Бога.
Слава, и ныне:
Рождшая Спаса и Избавителя миру, Марие Богородице, избави молитвами Твоими от всех скорбей и наветов схизматических Церковь Сына Твоего, да вси единодушно в нераздельном существе со Отцем Того и Духом славим единаго Бога.
Песнь 4, ирмос
Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.
Помилуй нас, Боже, помилуй нас.
Да от лести вражия Церковь Свою избавиши нещадно кровь Свою излиял еси, Владыко Христе, и ныне тех ради излияния от всех новосплетенных ересей и прелестей схизматических избави, молимся, и невредну соблюди, яко един человеколюбец.
Помилуй нас, Боже, помилуй нас.
Изостриша зубы немилостивно, расшириша уста звероподобне отступницы якоже расторгнути и поглотити Церковь Твою, Христе Царю, но Ты во устех их сокруши лестныя зубы их, невредно от сих стадо Свое соблюдая, яко един человеколюбец.
Помилуй нас, Боже, помилуй нас.
Божественною Твоею премудростию на посрамление противных лестий правителей Церковных сердца умудри, Христе, молим Тя усердно, и светом Твоего богоразумия на утверждение истинныя в Тя веры язык уясни и разум их просвети, яко един человеколюбец.
Слава, и ныне:
Жестоковыйных отступник развращенный разум Церкви Православной силою бодрых Твоих молитв покори, Богородице Чистая, и мрак прелести от сердец их скоро отжени, да с нами единодушно Христа правоверно славят, единаго человеколюбца.
Песнь 5, ирмос
Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Помилуй нас, Боже, помилуй нас.
Право правити слово Твоея истины даждь благодать иерархом Твоим, Христе человеколюбче, и всем правителем Церкви Твоея, Спасе, ереси же вся и отступства искорени, благодетелю многомилостиве.
Помилуй нас, Боже, помилуй нас.
Славити Тя, Христе, в православии мирно Церкви Твоей даруй, молим, человеколюбче, и от озлоблений и пагубных обстояний скоро изымая, от всех нужд ныне, от отступник ей належащих спаси, благодетелю многомилостиве.
Помилуй нас, Боже, помилуй нас.
Нуждею раздирают отступници лестныи ризу Церкве Твоея, Христе, от вышня Твоего истканую Богословия, но Ты яко благ, Божественною Твоею силою, скоро даже не поработимся, предварив изми, и от душегубных их рук избави, благодетелю многомилостиве.
Слава, и ныне:
Юнцы тучнии обыдоша Церковь Сына Твоего, Богородице, и яко лви рыкающе хульная своя на поглощение ея разверзша уста: но Ты ныне предстани, крепкая христианом в бедах помощнице, и сих вскоре разжени, Христа о нас молящи, благодетеля многомилостиваго.
Песнь 6, ирмос
Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Помилуй нас, Боже, помилуй нас.
Моря прелестнаго волны паче меры на потопление воздвигоша Церкве Твоея Христе, но Ты ныне вскоре якоже иногда чувственному морю, от сна востав запрети, и от потопления душегубнаго избави, молитвами всех святых Твоих.
Помилуй нас, Боже, помилуй нас.
Лук свой напрягоша отступници и оружие извлекоша, состреляти и заклати нищих и убогих раб Твоих, право в Тя верующих, но оружие их, Христе, сотвори внити в сердца их, и луцы их да сокрушатся, ничтоже вреждающе нас, молитвами всех святых Твоих.
Помилуй нас, Боже, помилуй нас.
Из глубины сердца со слезами припадаем Ти, Христе Царю, прилежно моляще от настоящия сопротивных беды и тяжкаго наваждения Церковь Свою избави, и в мире глубоце сию невредиму от них сохрани, ереси вся и отступства скоро потребляя, молитвами всех святых Твоих.
Слава, и ныне:
Треокаянное отступство лестны воздвигоша, Пречистая Дево, на Церковь Сына Твоего, честною искупленную кровию, разорити ю от основания хотяще, но Ты, христианское прибежище, скоро Христови молися сех разорити, сию же умирити, Матерних Твоих ради молитв и всех святых Его.
Кондак, глас 4-й
Скоро предвари, да не поработимся, врази бо хулят и претят нам, Христе Боже, но порази Крестом Своим борющихся с нами, и советы их вскоре разори, да разумеют вси, являющии рабом Твоим злая, и яве познают колико может православных вера, молитвами Богородицы, едине человеколюбче.
Песнь 7, ирмос
Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Помилуй нас, Боже, помилуй нас.
Тя Бога, Спаса, и Искупителя, и Жениха Церкви усердно призываем, Христе, невесту Свою из руки законопреступных, умертвити ту ищущих, мышцу лести их сокрушая, избави, да поем ти непрестанно: отец наших Боже, благословен еси.
Помилуй нас, Боже, помилуй нас.
Пеструю вереницу лести, еюже запяти Церкви Твоей льстивый тщится змий, скоро расторгни, Господи, и сети его сокруши, да от сих избавлени бывше, единогласно Тебе вопием: отец наших Боже, благословен еси.
Помилуй нас, Боже, помилуй нас.
Терпение в напастех нам мужественное, спасение соделовающее, подаждь, Спасе, в искушении паче силы не вводя, но избави от всех лукавых на нас отступнических лестий нападающих, да в православии всегда Тебе вопием: отец наших Боже, благословен еси.
Слава, и ныне:
Мольбу сотвори к Сыну Своему и Богу, Марие Богоневесто, да воздвигнув силу Божественную Свою от бед отступнических и ересей безбожных, пришед, Церковь Свою спасет, и от прелестей избавит, верно Ему вопиющих: отец наших Боже, благословен еси.
Песнь 8, ирмос
Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Помилуй нас, Боже, помилуй нас.
Гибнущих нас, и на всяк день прелестию умаляющихся отступства, Христе человеколюбче, яко Петра в море утопающаго, спаси, на камени истиннаго Твоего исповедания крепко утверждая, верно поющих: дела вся Господня Господа пойте и превозносите Его во веки.
Помилуй нас, Боже, помилуй нас.
Лают, рыкающе хульно, яко львы люты, на Церковь Твою, Христе, в лестной ограде своей отступничестии дети, немилостивно восхитити ту хотяще, но Ты, Владыко, кровь Свою тоя ради излиявый, не предаждь нас до конца в руки враг наших, да верно поем Ти: дела вся Господня Господа пойте и превозносите Его во веки.
Помилуй нас, Боже, помилуй нас.
Архиерею вечный, Христе, иерархию Свою на земли сущую православием утверди, Церковь неодолеему адовыми враты, по Своему Ти обещанию, Владыко, во веки сохрани, и от настоящих бед избави, верно Тебе поющих: дела вся Господня Господа пойте и превозносите Его во веки.
Слава, и ныне:
Манием богодетельным создавший всяческая, и студа плоть заимствовав, родися, Пречистая, да нас от лести избавит вражия, Того моли, Пречистая, молимся усердно, и ныне от настоящия беды Церковь Свою избавити и спасти, верно Тому вопиющих: дела вся Господня Господа пойте и превозносите Его во веки.
Песнь 9, ирмос
Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово Воплощенно, Егоже величающе, с небесными вои Тя ублажаем.
Помилуй нас, Боже, помилуй нас.
Дряхлое и от волк хищных возмущенное словесное Твое, Христе, стадо воплем крепким вопиет: ущедри, и помилуй, и избави нас вскоре от сети ловящих, да не до конца погибнем, но Тя нам верным едину сущую Главу во веки величаем.
Помилуй нас, Боже, помилуй нас.
И трепещуще, и боящеся, со страхом многим, ведуще своя безмерная согрешения, Владыко Христе, к Тебе припадаем, и Тебе молимся: веру утверди, Церковь умири и от прелести отступства скоро избави, да Тя нам едину сущую Главу правоверно во веки величаем.
Помилуй нас, Боже, помилуй нас.
Лесть жестокую всех ересей и хульнаго отступства пагубу разруши до конца и искорени, Спасе, раздирания церковная утеши, расточенная же собери и святому Твоему стаду совокупи, и нас в православии умири, да Тя едину нам сущую Главу во веки величаем.
Слава, и ныне:
Погубити лестныя потоки вся и скоро иссушити, молися, Пречистая, Сыну и Богу Твоему, заблуждших к познанию истины обратити, Церковь Свою умирити, и нас всех православно в вере утвердити молим Тя, Владычице Дево, да Тя истинно сущую Богородицу во веки правоверно величаем.
Из книги:
Записки святителя Петра Могили. Київ: Фенікс, 2011. С.187-195.
